Os fíos de infantil: Innovarte Educación Infantil: 8

Sei que me repito cando falo destas mulleres, pero de verdade que sinto tal admiración por elas que non me canso de eloxialas. E seguramente calquera que lea os seus libros ou o seu blog dirá: "Bea, pero se non fan nada do outro mundo". Xa. Seino. E precisamente por iso me encantan.Coa presión que hai hoxe en día no ámbito da educación por ser a que fai cousas máis espectaculares, as manualidades máis bonitas, a que usa a APP máis novidosa, a que participa na convocatoria máis actual da Consellería aínda que en realidade o traballo o faga o profesorado e non o alumnado... Isabel e Ángeles logran non caer niso e seguen facendo o tipo de educación no que cren de verdade. Respectando os tempos e necesidades das crianzas, aproveitando os innumerables recursos que temos na nosa contorna máis próxima e que nunha etapa como Educación Infantil son incriblemente ricos, escoitando ás nenas e nenos e as súas familias.Deixando que o propio alumnado sexa de verdade o protagonista e centrándose non procesos, non nos resultados. Porque esta idea dise moito pero practícase pouco, xa dende as propias facultades de Educación.Nesta ocasión as irmás Abelleira Bardanca fan unha metáfora na que comparan o seu traballo co das tecedoras de mantas, polo que estruturan o libro en 20 fíos e mostran pequenas pílulas do que fan nas súas aulas en relación con diferentes ámbitos (o coñecemento da contorna, o desenvolvemento dos sentidos, como inculcan a necesidade de ser agradecidxs, a admiración do cotiá, como traballan a arte...). Un pouco de todo, porque esa é a realidade das aulas de infantil, pero sempre coa pegada tan respectuosa que as caracteriza.